Jenny elskar å spele gitar i band med nabo og besteven Signe. Dei er ferdige med 6. klasse og sommarferien skal bli den beste sommaren ever for dei skal spele masse og har lova kvarandre: ingen klissete kjærastar, berre speling. Og så blir dei spurd om å spele på bygdas siderfestival!
Men i staden for å bli glad, blir Signe rar og ho kjem med den verste beskjeden: ho skal flytte til Stavanger! Om ei veke! Siderfestivalen er om fire veker og ikkje nok med at Signe skal flytte, ho skal på sydenferie i to veker!
Dei prøver å skrive låtar over telefon, men i Syden møter Signe Fabian. Og heime i Lierbygda flytter den kulaste rockejenta frå Oslo inn i huset til Signe; Sara. Ho ber Jenny på smoothie og jamming, men skal Jenny bli med på det og svikte besteveninna si? Det skader vel ikkje å berre henge litt med den nye nabojenta? Og kvifor kjenst det som trampeklapp i magen kvar gong ho ser Sara?
Jenny Fender er ei barnebok full av rock, kjensler og bygdeliv. Det er mykje som skjer hjå Jenny, både i kjenslelivet og livet elles. Historia er engasjerande og lettlesen. Den er full av liv og er lett å kjenne seg att i, særleg for dei av oss som bur i ei lita bygd og har store draumar.
Har du lest Maria Parr sine bøker om kule jenter frå små bygder vil Jenny Fender vere eit godt, nytt tilskot.
